Një kazino është tentuar të grabitet në orët e para të mëngjesit të sotëm në Tiranë.
Kështu nga raportimet në numrin e Emergjencave 112, është njoftuar në orën 04:10 një grabitje me armë zjarri në zonën e Kinostudios, nga dy persona.
Menjëherë me t’u njoftuar, në vendngjarje kanë mbërritur uniformat blu, dhe vetëm disa minuta më pas është bërë i mundur ndalimi i njërit prej autorëve të dyshuar të grabitjes.
Kështu në pranga është vënë shtetasi Armando Demiri, 30 vjeç, banues në Tiranë, ndërsa është identifikuar autori i dytë, i dyshuar për ngjarjen, i cili është shtetasi me inicialet D.S, 29 vjeç.
Ky i fundit ka mundur të largohet nga vendngjarja, dyshohet se ka pasur me vete një armë zjarri tip pistoletë.
Sakaq, policia e ka shpallur në kërkim dhe ka ngritur pika kontrolli të shumta me qëllim kapjen e tij.
